Today News

မြန်မာ့အရေး ငြိမ်းချမ်းစွာ အဖြေရှာဖို့ အာဆီယံခေါင်းဆောင်တွေကို ကုလအကြီးအကဲ ဆော်သြ

မြန်မာနိုင်ငံမှာ ဖေဖေါ်ဝါရီလ ၁ ရက် စစ်တပ်အာဏာသိမ်းခဲ့တဲ့ နောက်ဖြစ်ပွားနေတဲ့ သွေးမြေကျ အကြမ်းဖက်မှုတွေကို ဖြေရှင်းဖို့ အာဆီယံခေါင်းဆောင်တွေ ညီညီညွတ်ညွတ်ကြိုးစားကြဖို့ ကုလသမဂ္ဂအတွင်းရေးမှူးချုပ် Antonio Guterres က တောင်းဆိုလိုက်ပါတယ်။

“မြန်မာနိုင်ငံ့အရေးဟာ ဒေသတွင်း ကြုံတွေ့နေရတဲ့ အရေးတကြီး ပြဿနာတရပ် ဖြစ်နေတဲ့အတွက် ဒီကနေ့ အာဆီယံရဲ့ အခန်းကဏ္ဍဟာ ဘယ်တုန်းကနဲ့မှမတူအောင် အရေးပါနေကြောင်းနဲ့ မြန်မာစစ်တပ်ရဲ့ ဖိနှိပ်မှုတွေနဲ့ အကြမ်းဖက်မှုတွေ အဆုံးသတ်စေဖို့ နိုင်ငံတကာ အသိုင်းဝိုင်းကနေ ၂ နိုင်ငံ ချင်းဖြစ်စေ၊ အားလုံးစုပေါင်းပြီးဖြစ်စေ လုပ်ဆောင်ကြဖို့ ထပ်မံတောင်းဆိုပါတယ်” လို့ ပြောသွားတာပါ။

အာဆီယံ အဖွဲ့အနေနဲ့ မြန်မာနိုင်ငံအတွက် သံတမန်ရေးဆိုင်ရာ၊ ပဋိပက္ခကာကွယ်ရေးဆိုင်ရာနဲ့ ငြိမ်းချမ်းမှု တည်ဆောက်ရေး ဆိုင်ရာတွေမှာ သိပ်အရေးပါကြောင်း ကုလသမဂ္ဂနဲ့ အာဆီယံ အပါအဝင် ဒေသတွင်းအဖွဲ့အစည်း တွေကြား ပူးပေါင်းဆောင်ရွက်ရေး ဆိုင်ရာ လုံခြုံရေးကောင်စီရဲ့ တနင်္လာနေ့ ဆွေးနွေးပွဲမှာ အတွင်းရေးမှူးချုပ်က ထောက်ပြ ပြောဆိုခဲ့တာ ဖြစ်ပါတယ်။

အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် Christine Schraner Burgener ဟာ ဒေသတွင်းကို ရောက်ရှိနေပြီး မြန်မာနိုင်ငံ ဒီမိုကရေစီလမ်းကြောင်းပေါ် ပြန်ရောက်ဖို့နဲ့ တည်ငြိမ်အေးချမ်းစေဖို့ အတွက် သူ့အနေနဲ့ စစ်တပ်နဲ့ရော တခြားအဖွဲ့အစည်းတွေနဲ့ပါ ဆွေးနွေးပြောဆိုဖို့ အသင့်ရှိနေကြောင်းလည်း ပြောပါတယ်။

မစ္စ Burgener ဟာ ဧပြီလ ၉ ရက်နေ့ကတည်းက ထိုင်းနိုင်ငံ ဘန်ကောက်ကို ရောက်ရှိနေတာ ဖြစ်ပြီး မြန်မာနိုင်ငံတွင်း သွားရောက်ဖို့ ပန်ကြားချက်ကို မြန်မာစစ်တပ်ကတော့ ပြည်ဝင်ခွင့် မပေးသေးပါဘူး။

မြန်မာနိုင်ငံမှာ ဖေဖေါ်ဝါရီ ၁ ရက် စစ်တပ်အာဏာသိမ်းပြီး ကတည်းက မစ္စ Burgener ဟာ ဒေသတွင်းကို ပထမဆုံး အကြိမ် သွားရောက်တာ ဖြစ်ပြီး ဘန်ကောက်မှာ ထိုင်းအာဏာပိုင်တွေ၊ ဒေသဆိုင်ရာ ကုလသမဂ္ဂအရာရှိတွေနဲ့ ဘန်ကောက်ရှိ မြန်မာနိုင်ငံဆိုင်ရာသံရုံးတွေက သံအမတ်တွေနဲ့ မြန်မာ့ စစ်အာဏာသိမ်းမှု အရေးကို ဒေသတွင်းနိုင်ငံတွေရဲ့ တသဘောတည်း ဆောင်ရွက်ချက်ကို အခြေခံပြီး ထိရောက်တဲ့ နိုင်ငံတကာ တုံ့ပြန်ဆောင်ရွက်မှု တခု ဖြစ်လာအောင် ဆောင်ရွက်နိုင်ရေး ဆွေးနွေးနေတာ ဖြစ်ပါတယ်။

Comment here