Today News

မင်းတပ်မှာ စစ်တပ်နဲ့ ဒေသခံကာကွယ်ရေးအဖွဲ့ကြား တိုက်ပွဲဖြစ်နေဆဲ

စစ်အုပ်ချုပ်ရေး ထုတ်ပြန်ထားတဲ့ မင်းတပ်မြို့နယ်မှာ ဒီနေ့လည်း စစ်တပ်နဲ့ ဒေသခံကာကွယ်ရေးအဖွဲ့တွေကြား တိုက်ပွဲဖြစ်ပါတယ်။ စစ်တပ်ဘက်က လက်နက်ကြီးတွေနဲ့ အဓိကထား တိုက်ခိုက်တဲ့အတွက် ဒေသခံတဦး သေဆုံးပြီး တချို့ ဒဏ်ရာရခဲ့ပါတယ်။ စစ်တပ်ဘက်မှာလည်း ဒဏ်ရာရသူတချို့ရှိတယ်လို့ တပ်မတော်ပြောခွင့်ရကပြောပါတယ်။ မင်းတပ်ဘက်ကတိုက်ပွဲ အခြေအနေကို ဗွီအိုအေသတင်းထောက် နိုင်ကွန်းအိန်က သတင်းပေးပို့ထားပါတယ်။
ချင်းပြည်နယ် မင်းတပ်မြို့နယ်မှာ မေလ ၁၃ ရက်နေ့ညပိုင်းက စစ်အုပ်ချုပ်ရေး ထုတ်ပြန်ခဲ့ပြီးနောက် စစ်တပ်ဘက်က အင်အားဖြည့် ထိုးစစ်ဆင်တိုက်ခိုက်တဲ့အတွက် ဒေသခံ မင်းတပ် ပြည်သူ့ကာကွယ်ရေးအဖွဲ့တွေနဲ့ ဒီနေ့လည်း တိုက်ပွဲဖြစ်ပါတယ်။
မင်းတပ်မြို့တွင်းနဲ့ မြို့အပြင်ဘက်မှာရှိတဲ့ ဂေါက်ကွင်းနားမှာ မကွေးတိုင်း ကျောက်ထုမြို့ဘက်ကလာတဲ့ စစ်ကောင်စီတပ်တွေနဲ့မနက်ပိုင်းက ပစ်ခတ်တိုက်ခိုက်မှုဖြစ်ပွားခဲ့တဲ့အကြောင်း မင်းတပ်ကာကွယ်ရေးအဖွဲ့ပြန်ကြားရေးတာဝန်ခံက ပြောပြပါတယ်။
“တိုက်ပွဲအခြေအနေကတော့ ဒီနေ့မှာလည်း ဆက်လက်ပစ်ခတ်နေကြတာပေါ့နော်။ ကျောက်ထုကလာတယ်။ တိုက်ပွဲက ဖြစ်နေတုန်းပဲ။ မြို့အရှေ့ဘက်ပေါ့နော် ဂေါက်ကွင်းအောက်နားက။ ၂ မိုင် ၃ မိုင်လောက်တော့ဝေးတယ်။ တချိန်ထဲမှာပဲ မြို့တွင်းမှာ လက်နက်ကြီးတွေနဲ့လှမ်းပစ်နေတယ်။ ဒီနေ့ ၂၇၄ တပ်ရင်းဘက်ကလည်း မြို့တွင်းကို လက်နက်ကြီးတွေနဲ့ပစ်နေတာပဲ။”
မင်းတပ်မြို့နဲ့ ၁၈ မိုင်ကွာဝေးတဲ့ ကျောက်ထုမြို့ကလာတဲ့ စစ်ကူတွေကို ကာကွယ်ရေးအဖွဲ့တွေက မြို့အပြင်ဘက်ကနေ ခုခံတိုက်ခိုက်နေသလို မင်းတပ်မြို့ အခြေစိုက် ၂၇၄ တပ်ရင်းကလည်း မင်းတပ်ကာကွယ်ရေးအဖွဲ့တွေနေရာယူထားတဲ မြို့တွင်းအဆောက်အဦးဘက်ကို လက်နက်ကြီးတွေနဲ့ ပစ်ခတ် တိုက်ခိုက်ခဲ့ပါတယ်။
အပစ်အခတ်တွေ ညနေပိုင်းလောက်မှာ ရပ်သွားခဲ့ပေမဲ့ စစ်တပ်ဖက်က ရဟတ်ယာဉ်နဲ့ မြေပြင်အခြေအနေကို ထောက်လှမ်းနေတယ်လို့လည်း ကာကွယ်ရေးအဖွဲ့ခေါင်းဆောင်တွေက ပြောပါတယ်။ မနက်က အပြန်အလှန်တိုက်ခိုက်မှုတွေအတွင်း ကာကွယ်ရေးအဖွဲ့ဘက်က ၁ ယောက်သေဆုံးပြီး ဒဏ်ရာရသူ အနည်းငယ်ရှိခဲ့တယ်လို့ ပြောပါတယ်။
“သူတို့ဘက်က ခန့်မှန်းခြေကတော့ အနဲဆုံး ၁၀ ယောက်ကျော်လောက်ရှိမယ်။ အကျဆုံးဖြစ်မယ်ခင်ဗျ။ ကျွန်တော်တို့ဘက်က အကျဆုံး ၁ ယောက်ရှိမယ်။ ဒဏ်ရာရတဲ့သူက နည်းနည်းရှိတယ်ခင်ဗျ။ မြို့တွင်းမှာသူတို့သေနတ်ကျည်ပေါ့လေ ပစ်ခတ်မှုတွေရှိနေတော့ ခေါင်မိုးကနေပြီးတော့ ကျည်ဆံတွေဗုံးတွေကွဲပြီးမှ အိမ်ရှေ့ခန်းထဲမှာပုန်းနေတဲ့ ကျန်းမာရေးဝန်ထမ်းတဦးပဲ။ ကျည်ဆံမှန်တာ တွေဖြစ်တာပေါ့။”
စစ်တပ်ဘက်ကလည်း ဒဏ်ရာရသူတချို့ရှိတယ်လို့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောပါတယ်။
“မင်းတပ်ဂေါက်ကွင်းနားလေးမှ ာတကြိမ်ဖြစ်ပွါးခဲ့တာရှိတယ်။ ကျနော်တို့ အကြမ်းဖက်အဖွဲ့အင်အား ၁၀၀ ကျော်လောက်ရှိ တယ်။ အဲဒီမှာလုံခြုံရေးလုပ်နေတဲ့အဖွဲ့တွေ ပစ်ခတ်တဲ့ဟာတော့ရှိပါတယ်ဗျ။ ကျွန်တော်တို့ဘက်က ထိခိုက်ဒဏ်ရာရရှိမှု အနည်းငယ် ရှိပါတယ်။”
မင်းတပ်မြို့နဲ့ မတူပီမြို့ထိဆက်နေတဲ့ နေရာဘက်မှာလည်း မတူပီဖဘက်ကလာတဲ့ စစ်တပ်နဲ့ မင်းတပ်ကာကွယ်ရေးအဖွဲ့တွေကြား တိုက်ပွဲတွေဖြစ်ခဲ့ပါတယ်။ စစ်တပ်ဘက်က လက်နက်ကြီးတွေသုံးတဲ့အတွက် လက်နက်မမ ျှဖြစ်နေတယ်လို့ ကာကွယ်ရေးအဖွဲ့ဘက်ကပြောပါတယ်။
“မတူပီဘက်ကလာတဲ့စစ်ကူတွေ အဲဒီမိုင် ၃၀၊ ၄၀ ဝန်းကျင်မှာပဲ။ အဲဒီမှာလည်း သူတို့လက်နက်ကြီးတွေပါလာတယ်။ လူအင်အား အပြည့်နဲ့ပါလာတယ်။ အဲတာကို ကိုယ့်လူတွေက တူမီးတွေ ခါးချိုးတွေလောက်ပဲ ကိုင်တယ်ဆိုတော့ ပစ်တာခတ်တာပြီးရင် ကိုယ့်လူတွေက ဆုတ်ရတာပေါ့။ ဆုတ်တဲ့အခါမှာကျတော့ တောထဲတောင်ထဲမှာ လူရိပ် နည်းနည်းတွေ့ပြီဆိုတာနဲ့ လက်နက်ကြီးနဲ့ လှမ်းလှမ်းထုနေကြတယ်။”
မင်းတပ်မြို့မှ ာစစ်အာဏာရှင်ဆန့်ကျင်ရေး ဆန္ဒပြလှုပ်ရှားသူတွေကို ဧပြီလ ၂၄ ရက်နေ့မှာ စစ်တပ်ဘက်က သပိတ်ဖြိုခွဲ ဖမ်းဆီးမှုတွေ ရှိခဲ့ပြီးနောက်ပိုင်း ဒေသခံကာကွယ်ရေးတပ်တွေနဲ့ စစ်တပ်ကြား ပစ်ခတ်မှုတွေ ဖြစ်ခဲ့တာပါ။
အလားတူ ချင်းပြည်နယ် ကန်ပက်လက်မြို့မှာလည်း ကြာသပတေးနေ့ညက စစ်ကောင်စီတပ်ဖွဲ့နဲ့ကန်ပက်လက်ပြည်သူ့လုံခြုံရေးအဖွဲ့တို့အကြား ပစ်ခတ်တိုက်ခိုက်ခဲ့တယ်လို့ ကန်ပက်လက်မြို့ခံတဦးကပြောပါတယ်။
“မနေ့ညက တိုက်ပွဲပုံစံမျိုးတော့ မြို့ထဲမှာ ကန်ပက်လက်ပြည်သူ့ကာကွယ်ရေးတပ်ရယ်၊ စစ်ကောင်စီဘက်ကဟာတွေနဲ့ ပစ်ခတ်မှုတော့ရှိတယ်။ မနေ့ည ၉ နာရီလောက်မှာလေ။ နာရီဝက်လောက်တော့ကြာမယ်။ ကန်ပက်လက်မြို့ မြို့မ (၁) မြို့မ (၂) ရပ်ကွက်မှာလေ။ ပစ်တော့ပစ်တယ် ဒါပေမဲ့ဘယ်သူမှလည်း အပြင်မထွက်ရဲကြဘူးလေ။ အကုန်လုံး တံခါးပိတ်ပြီးတော့အိမ်ထဲမှာပဲ နေနေကြ တယ်။ ထိခိုက်သေဆုံးမှုအခြေအနေတော့ မကြားရသေးဘူး။”
ချင်းပြည်နယ် မင်းတပ်မြို့၊ ဟားခါးမြို့၊ ကန်ပက်လက်မြို့တွေမှာ ဒေသခံကာကွယ်ရေးအဖွဲ့တွေက တူမီးသေနတ်တွေအပြင် ရရာလက်နက်စွဲကိုင်ပြီး ကိုယ့်ဒေသကို ကာကွယ်ဖို့အတွက်ဆိုပြီး စစ်တပ်ကို ခုခံတိုက်နေကြတာဖြစ်ပါတယ်။

Comment here